БИШКЕК, 23-окт. — Sputnik. Түрмөдөн качып чыккан кылмышкер Алтынбек Итибаевди жок кылуу операциясында курман болгон тез арада аракетке келе турган атайын даярдыктагы отряддын жоокери Төлөбек Исмаилов "Кыргызстандын Баатыры" сыйлыгына көрсөтүлүшү мүмкүн экенин өкмөттүн маалымат кызматынын жетекчиси Назира Ахмедова билдирди.
Ахмедованын айтымында, Исмаиловдун үй-бүлөсүнө президент бир миллион, ал эми өкмөт 50 миң сом бөлөт.
"Мындан тышкары, ИИМдин жарадар болгон жоокерине да өкмөт тарабынан 50 миң сом бөлүндү. Каза болгон жай тургундардын үй-бүлөсүнө да акча каражаты жеткирилип, өкмөт аларды жерге берүү боюнча чыгымдын баарын көтөрдү", — деди ал.
Ахмедова өкмөт атайын операция учурунда жабыркаган үйлөрдүн ээлерине компенсация төлөп берүү маселеси талкууланганын белгиледи.
"Маселе тез арада, суук түшкөнгө чейин чечилиши керек", — деди маалымат кызматтын жетекчиси.
Качкан кылмышкерлердин бешөө ошол эле түнү кармалып, төртөө из суутканга үлгүргөн. Ал эми түрмөгө кайтарылган кылмышкерлердин үчөө ооруканадан үч күндүн ичинде каза болду.Атайы операциянын натыйжасында качкындардын экөө жок кылынган. Бирөөсү Эдил Абдырахманов бейшемби күнү "Ала-Тоо" айылынан кармалган. Издөөдө ИИМ тарабынан жок кылынган Итибаев жалгыз калган эле.
