БИШКЕК, 20-окт. — Sputnik. Республикалык олимпиадалык резерв окуу жайынын иши 9-ноябрга чейин токтотулганын Билим берүү жана илим министрлиги билдирди.
Мындай чечим премьер-министр Темир Сариевдин жетекчилиги алдында өткөн жыйын учурунда кабыл алынды.
Бүгүн, 20-октябрда эртең мененки саат 8.30да Республикалык олимпиадалык резерв окуу жайынын 60ка жакын окуучусу таяк, союл көтөрүп келип №38 мектептин ичине кирип окуучуларды сабап, терезе-эшигин талкалап кеткен. Кылмышка шектелип аталган окуу жайдын 47 тарбиялануучусу кармалып, Бишкек ШИИБ тарабынан "Бейбашчылык" беренеси боюнча кылмыш ишин козголгон.
Жыйында Билим берүү жана илим министрлиги менен Мамлекеттик дене тарбия жана спорт агенттиги окуу жайды толук текшерип чыгууга милдеттендирилди.
Мындан тышкары, училищенин жетекчилиги кызматтан кетти.
