Ата-эне: олимпиадалык резервдер окуу жайын жаап салыш керек

38-мектептеги окуучулардын ата-энелери.
38-мектептеги окуучулардын ата-энелери. - Sputnik Кыргызстан
Жазылуу
Назима Текенова №38 мектепке олимпиадалык резервдер окуу жайынын тарбиялануучулары улам кол сала бергендиктен, балдарын башка мектепке которууну ойлоп жатканын айтты.

БИШКЕК, 20-окт. — Sputnik. Тынч заманда мектептерде мушташ болгону туура эмес жана, агрессиялык аракеттер улана берсе, олимпиадалык резервдик окуу жайын жаап салуу керек. Мындай пикирин №38 орто мектептин окуучусунун апасы Назима Текенова Sputnik маалымат агенттигине билдирди.

Бүгүн эртең менен Бишкек шаарындагы №38 орто мектепке ошол райондо жайгашкан Бишкек шаарынын Шералы Сыдыков атындагы Республикалык олимпиадалык резервдер окуу жайынын окуучулары кирип барып, айнектерин талкалаган.

"Спорт окуу жайынын жетекчиси мындай иштерге чара колдонбойбу. Булар балдардын жүрөгүнүн үшүн алганы аз келгенсип, окуу процессине да терс таасирин тийгизип жатат. Эгерде жетекчилери окуучуларын көзөмөлдөй албаса, анда бул окуу жайды таптакыр эле жаап ташташ керек го. Балдар ата-энелерди, мугалимдерин укпаса, коомду сыйлабаса, коопсуздук жараткан мектептин эмне кереги бар", — деди Текенова.

Ал бүгүнкү окуядан кийин №38 орто мектепке окуган эки баласын башка мектепке которууну ойлоп жатканын айтты.

"Негизи, №38 мектеп жакшы билим берет, бизге жагат, башка райондо жашасак да, балдарым бул жактан окуйт. Бүгүнкү окуядан кийин аларды башка мектепке которсомбу деп ойлоп жатам. Агрессиялык аракеттер муну менен токтойбу, токтобойбу белгисиз да. Мен билгенден эле 3-4-жолу болду", — деди ал. 

Бүгүн эртең менен №38 мектептин директорунун орун басары Маливакан Наматова колуна союл көтөргөн жүзгө чукул спорт кийимчен балдар мектепке чейин кирип келип, окуучуларды канжалатып сабап кеткенин билдирген. Анын айтымында, беш окуучунун көзү-башы жарылып жаракат алышкан. 

38-мектептеги милиция кызматкерлери. - Sputnik Кыргызстан
№38 мектепке кол салган деп шектелип спорт мектебинин 47 окуучусу кармалды
Дене тарбия жана спорт боюнча мамлекеттик агенттиктин маалымат кызматы спорт мектептин тарбиялануучулары окуучуларды сабаган фактыны тастыкташкан.

Вице-мэр Айгүл Рыскулова билдиргендей, жабыркаган беш окуучуну текшерүүгө алып кетишти. Милиция видео көзөмөлдүн жазууларын карап жатат. Анын айтымында, жаалданып кирген балдарды мугалимдер тосуп, токтотууга аракет кылган.

Кармалгандар азыр жасагандарын мойнуна албай жатканын ШИИБдин жетекчисинин орун басары билдирди.

Эки мектептин окуучулары буга чейин да мушташып, бычакташа кетишкен. Анын кесепетинен олимпиадалык резервдер окуу жайынын алты окуучусу жаракат алган.

Жаңылыктар түрмөгү
0