БИШКЕК, 20-окт. — Sputnik. Күз-кыш мезгилине өкмөт толук даяр экенин, энергетика жана жылуулук системасындагы жабдыктар оңдоодон өткөрүлүп, көмүр, мазут керектүү көлөмдө даярдалганын Темир Сариев "Биринчи радионун" түз эфиринде билдирди.
Ал ошондой эле, кышында электр энергиясы, жылуулук жана жаратылыш газы үзгүлтүксүз берилерин кошумчалап, элди электр энергиясын үнөмдүү пайдаланууга чакырды.
Быйыл Датка-Кемин жогорку чыңалуудагы линиясы бүткөрүлүп, энергетикалык көз карандысыздыкка жетишкенин белгилеген Темир Сариев алдыда Кара-Кече көмүр кенин комплекстүү иштетүү, Жогорку Нарын ГЭСтер каскадына курулуп жаткан Камбар-Ата-2 ГЭСин пайдаланууга берүү боюнча пландар бар экенин билдирди.
Сариев мындан ары ар жуманын шейшемби күндөрү радионун түз эфиринде өкмөттүн аткарып жаткан иштери тууралуу жарандар менен баарлашып турат.
