БИШКЕК, 20-окт. — Sputnik. Бишкектеги спорт мектебинин 100гө жакын окуучусу колдоруна таяк, союл көтөрүп келип №38 мектептин ичине кирип окуучуларды сабап кеткенин аталган мектептин директорунун орун басары Маликаван Наматова Sputnik агенттигине билдирди.
Анын айтымында, спорт мектебинин балдар кармаган союлдардын башында мыктар бар болчу.
"Абдан коркунучтуу болду, беттерине маска кийип, башын чүмкөп алышыптыр. Мугалимдерге союл менен тап берип, аларды жөөлөгөн бойдон экинчи кабатка чейин чыгышты. Күзөтчүнү болсо жөөлөп эле коюп кетишти. Мектептин эшик-терезелери сынды", — деди ал.
Наматова 9-класстын беш баласынын бети башы-канап, белинен, бутанын, башынан жабыркаганын белгиледи. Аларга мектептеги дарыгерлер алгачкы жардам көрсөтүп, жараттарын таңышты.
Завуч спортчу балдар мектепке кантип кирип келгени видео көзөмөлгө жазылып калганын, спорт мектептин завучтары келип талкаланган терезе-эшиктерди, жабыркаган балдарды көргөнүн кошумчалады.
Нарматова ошондой эле, балдардын ата-энеси мектепке келгенин, мугалимдер балдарды дагы сабап кетпесин деп кайтарып жатышканын айтты. Учурда мушташ болгон мектепте милиция менен билим берүү министрлигинин өкүлдөрү иш алып барууда.
Бул окуя боюнча кылмыш иши козголуп, андан сырткары, Шералы Сыдыков атындагы олимпиадалык резерв мектебинин директорунун 3 орун кызматынан алынган.
