БИШКЕК, 19-окт. — Sputnik. Кыргызстандын борборунда жаңы светофорлор пайда боло турганын Sputnik агенттигине Жол кайгуул кызматынын (ЖКК) маалымат катчысы Тилек Оторов билдирди.
Дүйшөмбү күнү жеке ишканалардын бири мэр Кубанычбек Кулматовду, ЖКК жана курулуш-монтаждоо эксплуатациялык башкармалыгын жаңы светофорлор менен тааныштырды.
Оторовдун айтымында, мындай светофорлордун өзгөчөлүгү болуп үстүндөгү видеокамерасы эсептелинет. Ал унаа агымы кайсы тарапта көп болсо, ошол жакты өткөрүүгө көбүрөөк убакыт бөлүүгө жөндөмдүү.
"Фирманын өкүлдөрү унаанын агымы көп жакты өткөрүүгө жөндөмдүү функциялары бар экенин айтышты. Мындан тышкары, жарык өчкөн маалда да светофордун ишин үзгүлтүккө учуратпай турган кошумча ток берүүчү жабдыгы бар", — деди маалымат катчы.
ЖКК маалымат катчысынын айтымында, мэр Кулматов, эгер фирма шаардын баарын "акылдуу" светофорлор менен камсыздай турган болсо, орнотууга акча бөлүүгө даяр экенин белгиледи. Ишкана өкүлдөрү өз кезегинде жалпы системаны иштеп чыгуу үчүн убакыт керектигин билдиришти.
