БИШКЕК, 14-окт. — Sputnik. Кыргызстандын аймагындагы түрмөлөрдө жаткандар атайын кызматтардын көңүлүн өзүнө бурбаш үчүн өз эрки менен сакалдарын алып сала баштаганын абак жайындагы жеке булак билдирди.
Булактын берген маалыматына ылайык, камактагылар качып кеткен экстремисттерден улам өздөрүнө кошумча көңүл бурулушун каалашпайт.
Жаза аткаруу мамлекеттик кызматы бул фактыны тастыктап, камактагылардын айрымдары чындап эле сакалдарын алганын белгилешти.
Бүгүн милиция Бишкек шаарындагы ботаникалык бакта качып кеткендер жашынышы мүмкүн деп аларды издешти.
Дүйшөмбү күнү №50 түрмөдөн тогуз киши качып кеткен. Алар абакта иштеген үч кишини өлтүрүп, бирөөнү оор жарадар кылышкан. Качкандардын бешөө айланма жолдон кармалып, төртөө дагы эле издөөдө.
