БИШКЕК, 14-окт. — Sputnik. ИИМ бүгүн Бишкектин Ботаникалык багында эч кандай атышуу болбогонун, учурда ал жакта түрмөдөн качкан кылмышкерлер изделип жатканын расмий билдирди.
Шаршемби күнү эртең менен милицияга Курманжан датка көчөсүн бойлой жайгашкан Ботаникалык бактын аймагында түрмөдөн качып чыккан кылмышкерлерге окшош жарандар жүргөнү тууралуу маалымат түшкөн.
Аталган аймакка дароо ИИМдин ыкчам аракеттеги бөлүк кызматкерлери менен кинологдор келишкен.
"Ыкчам иликтөө иш-аракеттеринин жүрүшүндө эч кандай атышуу болгон эмес. Ботаникалык бактын жанында жайгашкан жаңы конуштун ээси үйүнүн чатырын салып, мындан улам балка-чоттун үнү жаңырууда. Милицияга чалгандар балким ушул үндү атышууга үндөштүрүп алышкандыр", — деп айтылат билдирүүдө.
Учурда аймакты тинтүү иштери улантылып жатат, аймакта ИИМдин бир нече бөлүктөрү иш алып барууда.
"Кылмышкерлер Бишкек шаары жана Чүй облусу боюнча изделип жатат. Бул аракеттерге күч түзүмдөрүнүн басымдуу бөлүгү тартылып, аталган аймактын айрым райондоруна жол буулган. Милиция күчөтүлгөн тартипте кызмат өтөп жатат", — деп билдирди ИИМ.
Дүйшөмбүгө караган түнү №50 түрмөдө отурган тогуз адам качып кеткен. Аларды токтотууга аракет кылган ЖАМК кызматкерлеринин үчөө өлүп, бирөө оор жарадар болгон. Атайын операция учурунда алардын бешөө кармалып, төртөө изин жашырганга үлгүргөн. Учурда алар изделип жатат.
