БИШКЕК, 14-окт. — Sputnik. Ош шаарында курулуп жаткан эстакадалык көпүрөнүн үстүн жана ага кеткен жолдорду асфальттоо иштери жүрүп жатат деп билдиришти Ош шаарынын мэриясынын маалымат кызматынан.
"Ош шаарынын Навои көчөсүндөгү көпүрөнүн курулушу эки мөөнөттө жүрүп жатат. Тирөөчтөрү орнотулуп, бекемделип, жерге шагыл төгүлдү. Ага катар эле Мажүрүм-Тал, Өзгөн жолдорунда жөө кишилер басуучу өтмөктөр курулууда", — деп билдирди маалымат кызмат.
Алар тирөөчтөргө жарыкты күчтүү берүүчү лампалар орнотулуп, күнү-түнү 250гө чукул курулушчулар 50 чамалуу атайын техникалар менен иштеп жаткандыгын кошумча билдиришти.
Ош шаарындагы бул эстакадык көпүрөнүн курулушу 2015-жылдын октябрь айынын аягында колдонууга берилиши керек. Түштүк борборго алгачкы ирет түшө турган бул объектинин узундугу 264, туурасы 24 метр.
