БИШКЕК, 22-янв. – Sputnik. Ош шаарында эстадакадалык көпүрөнүн экинчи этабынын курулушу жүрүп жатат, ал эми үчүнчү этабынын долбоору талкууланууда. Анын курулушуна россиялык гранттан бөлүнгөн 100 миллион сомдун 70 миллиону пайдаланылды. Бул туурасында Ош мэриясынын маалымат кызматы кабарлады.
Маалымат кызматы учурда ички жолдорду куруу иштери боюнча долбоор даярдалып жаткандыгын, бүгүн Ош шаарынын мэри Айтмамат Кадырбаев бир катар сунуштарды берип, долбоор кайрадан каралмай болгондугун билдирди.
Мэр Навои көчөсүнө курулуп жаткан эстакада көпүрөсүнүн курулушу жүрүп жаткан жерден кабар алып, көпүрөнү курууда эч кандай мүчүлүштүктөр кетпеши керектигин айтты. Иштеп жаткан курулушчулар менен сүйлөшүп, пикир алышты.
"Көпүрө Ош шаарынын элине татыктуу кызмат кылуу үчүн бул жерде иштеп жаткан ар бир курулушчунун иши жоопкерчиликтүү. Бул жерде бир гана мэрия эмес бүтүндөй шаар эли чоң үмүт менен сиздердин эмгегиңиздерге көз салып турат. Кетирилген бир гана кемчилик кылган баардык аракетибизди жокко чыгарбасы үчүн кылдаттык менен иш алып баруу зарыл", — деди Кадырбаев.
Ош мэриясынын басма сөз кызматынын маалыматында, көпүрөнүн курулушуна бөлүнгөн каражаттын жарымынан көбү сарпталды. Учурда эстакада көпүрөнүн курулушунда 80ге жакын жумушчу эмгектенип жатышат. Оор техникалардын 10дон ашуун түрү колдонулууда. Ал эми алардын эмгек акысы 30-35 миң сомдун тегерегинде.
Ош шаарынын вице-мэри Жапар Ормонов эстадалык көпүрөнүн курулушунун экинчи этабы жүрүп жаткандыгын, каражат жагынан маселе жоктугун айтты.
"Көпүрө россиялык гранттын эсебинен курулууда, ага 100 миллион сом бөлүнгөн. Бүгүн каржылык маселеси жок. Бул объектти куруу 3 этап менен каралган, биринчи этаптагы жер алдындагы жана жер үстүндөгү жүргүзүлүүчү иштер толугу менен бүттү. Учурда экинчи мөөнөт менен көпүрөнүн курулуш иштери активдүү жүрүп жатат. Эстакадалык көпүрөнү пайдаланууга берүү убактысын 2015-жылдын август – сентябрь айларына пландап жатабыз", — деди Ормонов.
Ош шаарына алгачкы ирет түшө турган эстакадалык көпүрөнүн узундугу 264, туурасы 24 метр.
