БИШКЕК, 10-окт. — Sputnik. Бийликке жол саясий атаандаштыктын негизиндеги таза шайлоо аркылуу жатат, деп биринчи вице-премьер Тайырбек Сарпашев шайлоонун инновациялык процессин талкуулоо учурунда билдирди.
Анын айтымында, ачык шайлоо өткөрүү менен Кыргызстан 2013-2017-жылга карата туруктуу өнүгүү улуттук стратегиясынын дагы бир маанилүү маселесин ишке ашырды.
Сарпашев өкмөт БШК менен тыгыз иш алып барып, эркин, адилеттүү жана эл аралык талаптарга жооп берген демократиялык шайлоо өткөрүүнү камсыздаганын белгиледи.
"Таза жана ачык шайлоо гана өнүккөн жана күчтүү Кыргызстандын өнүгүшүнө, мамлекетте адилет саясий системанын түзүлүшүнө алып келет", — деди атка минер.
Сарпашев айрым саясий күчтөр, ошондой эле жарандык коомдун өкүлдөрү биометрикалык маалымат чогултууга жолтоо болгонун айтып, бардык тоскоолдуктарга карабастан, биометриянын негизинде шайлоо өткөрүүгө дарамет жеткендигин билдирди.
"Биометрикалык маалымат чогултуудагы башкы көйгөй идентификациялоочу программанын жоктугу болду. Аны иштеп чыгууга германиялык компания 2 миллион евродон ашуун акча сурады. Мындай каражат жок эле. Натыйжада кыргызстандык программисттер өздөрү аталган программаны иштеп чыгышты. Бул чоң жетишкендик. Алардын эмгеги патенттелди", — деди биринчи вице-премьер.
Сарпашев эми програмисттер биометрия системасын социалдык блоктун башка тармактарына киргизүү боюнча программа иштеп чыгуу аракеттерин көрүп жатышканын кошумчалады.
Кийинки жумадан баштап Кыргызстандын аймагында биометрикалык маалымат кабыл алуу жараяны жанданат.
