БИШКЕК, 9-окт. — Sputnik. Кыргызстан — Тажикстан беттешүүсү учурунда эч кандай тартип бузуу катталбаганын Бишкек ШИИБ билдирди.
Кечээ, 8-октябрь күнү Бишкекте Дүйнө чемпионатынын тандоо турунун алкагында эки мамлекеттин футболчулары ат салышып, оюн 2:2 эсеби менен соңуна чыкты.
Милиция оюн учурунда да, андан кийин да коомдук тартип бузуу болбогонун белгиледи. Ал күнү Дөлөн Өмүрзаков атындагы стадиондо жана анын тегерегинде төрт миңден ашуун милиция кызматкери иштеди.
Мындан тышкары, беттешүү маалында шаардын бир катар көчөлөрү жабылды. Оюнду өз көзү менен көрүп, кыргызстандык футболчуларды колдоо үчүн стадионго 17 миң 600 көрөрман келген.
