БИШКЕК, 9-окт. — Sputnik. Жогорку Кеңештин иш башкармалыгы бюджеттин эсебинен 2,6 миллион сомго 120 кресло сатып алууну пландап жатат. Бул отургучтар парламенттин административдик залындагы жыйындар үчүн алына турганын КР парламентинин иш башкармалыгы билдирди.
Бейшемби күнү бул отургучтарды сатып алуу боюнча конкурс мамлекеттик сатып алуулардын расмий сайтында жарыяланды. Ошол эле учурда социалдык тармактардын бир нече колдонуучулары "эмне үчүн жаңыларын сатып алып жатышат, эскилерин колдонсо болбойбу?" деген суроолорго жооп издеп, өз пикирлерин жазышты.
"Беш жыл ичинде креслолор эскирип, алардын бурагычтары, дөңгөлөк буттары жешилди. Аларды карап чыктык. Биздин эсеп боюнча ар бир кресло 310 доллардан айланат", — деп Иш башкармалыгынан Sputnik агенттигине билдиришти.
Ошол эле учурда жаңы сатып алына турган креслолор буга чейинкилерден арзан болорун билдиришти. Бирок эски креслолор канча сомдон алынганын Иш башкармалыгынан так айтышкан жок.
"Өтө кымбат креслолор бар. Биз аларды 1000 доллардан сатып алган жокпуз да. Өзүңөр деле бааларды карап, салыштырсаңар болот. Эмне үчүн кишилер мынчалык сенсация кылып жатканын түшүнбөйбүз. 5 жыл ичинде креслолор жешилип, талкаланды да", — деп түшүндүрүштү парламенттин иш башкармалыгынан.
Жаңы сатылып алына турган отургучтарга карата талаптардын бири – өңү кара болушу керек, 6 айлык кепилдик берилип, 120 килограммдан ашык салмакты көтөрө алган жана накта териден жасалышы кажет.
Жогорку Кеңешке жаңы креслолорду сатып берчү компания 30-октябрда болчу конкурста аныкталат.
