БИШКЕК, 6-окт. — Sputnik. Кыргызстандын футбол боюнча курама командасынын коргоочусу ганалык Дэниел Тэго кыргыз кызына үйлөнгөнү жатканын Sputnik агенттигине өзү маалымдады.
Болочок жубайы Элнура Орозбаева менен Тэго эки жыл мурун таанышып, ошондон бери сүйлөшүп жүрүшкөн. Чүйдүн кызы Мамлекеттик каттоо кызматында иштейт.
Sputnik агенттигинин кабарчысы Элнураны да кепке тартып, футболчу менен болгон мамилесине кызыккан.
"Биз эки жыл мурун интернет аркылуу таанышканбыз. Өткөн айда Дэниел үйлөнүүнү сунуш кылган. Кыргыздын салты менен кыз узатуу расмисин жасадык", — дейт ал.
Орозбаева Дэниелди бардык оюнда колдоого аракет кылат. Кыздын айтымында, Кыргызстандын Австралия менен болгон оюнуна араңдан зорго кирген. Эми Тажикстан менен беттешүүдө да Дэниелди колдой турганын белгиледи.
"Эгер кийин уулдуу болсок, ал да футболчу болот", — дейт Элнура.
29 жаштагы ганалык футболчу машыктыруучу Сергей Дворянковдун чакыруусу менен шаардык "Дордой" командасында ойноо үчүн келген. Аны менен Дэниел россиялык "Камаз" футболдук клубунан бери тааныш болчу.
Кыргызстандык жарандыгын алган Тэго эки жылдан бери мамлекеттин улуттук курама командасында ойнойт.
