БИШКЕК, 4-окт. — Sputnik. Саат кечки төрткө карата парламенттик шайлоодо өз добушун берген жарандар 37,9 пайызды түзгөнүн маалымат жыйында Боршайкомдун мүчөсү Жаркын Бапанова билдирди.
Биометрикалык маалыматтарын тапшырган 2 миллион 761 миң 297 киши шайлоого катыша алат. Кечки саат 4.00гө карата 1 миллион 39 миң 99 шайлоочу добуш берди.
Бапанованын айтымында, Чүй облусу боюнча 173 миң 544 киши добуш берди, же бул жалпы шайлоочулардын 38,2 пайызына барабар.
Башка аймактарга салыштырмалуу Нарын облусунун тургундары шайлоого катышуу активдүүлүгүн көрсөтүп, 64 миң 665 киши (43,1 пайыз) добуш берүүгө келген.
Ошондой эле, жогорку көрсөткүч Талас облусунда байкалган. Бул аймактын 52 миң 867 (43 пайыз) тургун өз добушун берген.
Жалал-Абад облусунда 189 миң 585 киши (38,3 пайыз) шайлоого аттанып жаткан партияларга колдоо көрсөттү.
Ысык-Көлдө 89 миң 98 киши (37 пайыз) добуштарын берген.
Эң төмөн көрсөткүч чет мамлекеттерде катталып, чет жакта жүргөн шайлоочулардын 1 миң 293ү (8,4 пайыз) шайлоого келген.
Парламенттик шайлоодогу добуш берүүнүн жүрүшү тууралуу Sputnik инфографикасынан көрө аласыздар>>
