Техниканын тилин таап, темирге жан киргизген уста

Алгач велосипедге мотоциклдин моторун орнотуп тебүүгө ылайыкташтырса, кийин автоунааларды кураштыра баштаган. СССР тарагандан кийин айыл-чарба техникалары каралбай, сатылганы сатылып, калганы талкаланган. Жүрүүгө ылайыктуусун Абдыхамит Чыныбеков кураштырып, айылдыктардын талаа жумуштарын бир топ жеңилдетип келет.

Ал былтыр кышында жаңы трактор курап, жайында айдап-себүү иштерине, күзүндө жыйым-теримде колдонду.

"Бул тракторду кышы бою чогултум. Ага 60 миң сомдой кетти. Башка автоунаалардын тетиктерин бириктирип, өзүнчө техника курап чыктым. Бир сезондо жакшы иштесе 200 миң сомго чейин табам. Башка тракторлорго караганда жеңил болгондуктан, тоо-ташта жакшы жүрөт", — деди ал.

Чыныбеков ошондой эле каз тамандуу трактор менен комбайн да курап чыккан. Ал кураган комбайн Мундуз айылындагы жападан жалгыз техника. Күз келгенде ага кезекке туруп эгин чаптыргандардын саны көбөйөт.

Төрт уул, бир кыздын атасы Абдихамит Чыныбеков бир гана машиналарды кураштырууга кызыкпастан, гүл өстүрүүгө да кызыгат. Ал жаз келери менен түрдүү гүлдөрдүн уруктарын атайын алып келип себет.

"Гүлдүн уруктарын өзүм алып келем, башкаларга ишенбейм, себеби тандаганды билишпейт. Мен гүлдөрдү түсүнө, өсүү бийиктигине карап алып, ирети менен себем", — дейт ал.

Тоо койнунда жайгашкан мундуздуктардын үлүш жерлери өтө алыс болгондуктан, ал жакка айыл-чарба техникасы суудай керек.

Айыл устасы келечекте электр менен жүрө турган жеңил автоунаа курсам деген кыялда.