БИШКЕК, 1-окт. — Sputnik. Ош облусунун Ноокат районунда алма фестиваль-жармаңкеси өтө турганын БУУнун Өнүктүрүү программасынын өкүлү Турар Бекболотов билдирди.
Маалыматка ылайык, үстүбүздөгү жылдын 8-октябрында Зулпуев айыл аймагынын Кашкалдак айылында өтө турган иш-чара алма өндүрүүчүлөрдү колдоо, алма өндүрүү, кайра иштетүү, экспорттоо жана сактоо маселелерин талкуулоого багытталган.
"Фестивалдын негизги максаты — алма багын өстүрүү багытын жана анын маркетингин өнүктүрүүнүн мааниси тууралуу маалымдоо, ошондой эле алманын айыл чарба өндүрүшүндөгү ролун жогорулатуу. Мындан тышкары, иш-чара алманын кошумча нарк тутумун колдоого, алма өстүрүүчү фермерлерге дем берүүгө жана алардын ортосундагы тажрыйба алмашууга багытталган", — деп айтылат билдирүүдө.
Иш-чарага Айыл чарба министрлигинин, жергиликтүү өз алдынча башкаруу органдарынын өкүлдөрү, консалтинг берүүчү компаниялар, жергиликтүү ишкерлер, бизнес-ассоциациялар, Казахстан, Түркия жана Кытайдан келген ишкерлер, жергиликтүү тургундар жана бейөкмөт уюмдардын өкүлдөрү катышат. Иш-чарага 200дөн ашык адамдын келиши күтүлүүдө.
Фестивалдын алкагында алма көргөзмө-жармаңкеси, тегерек столдор, талкуулар уюштурулуп, оюн-зоок менен коштолот.
