Мамлекет башчы инфраструктуралык долбоорлорду ишке ашыруунун маанисин белгиледи. Атамбаев Бишкек — Нарын — Торугарт жана Бишкек — Балыкчы — Казарман автожолунун курулушунун аякташы, жакынкы аралыкта регион аркылуу өтө турган темир жолдун курулушу Нарын облусунун социалдык-экономикалык өнүгүүсүнө шарт түзөөрүн баса белгиледи.
"Эмнеге жолдордон баштадым. Себеби, жол барган, жол салынган жерлер өнүгөт, башкача регион болот. Ушул эле Нарын эки чоң жол, темир жол салынып бүткөндөн кийин Кудай буюрса, Кыргызстандын транспорт борбору болгону турат", — деди президент эл менен жолугушуп жатып.
Жолугушуунун жүрүшүндө облустагы курулуш жана социалдык объектилер маселелери дагы козголду. Атамбаев жакынкы эки жылдын аралыгында өлкөбүздө мектептердин жетишсиздик маселеси толук чечилерин баса белгиледи.
