БИШКЕК, 30-сен. — Sputnik. Президент Алмазбек Атамбаев 30-сентябрда, Нарын облусуна жасаган иш сапарынын алкагында Нарын шаарынын, Ак-Талаа, Нарын, Ат-Башы райондорунун активи менен жолугушту.
Атамбаев Бишкек – Нарын – Торугарт жана Бишкек – Балыкчы – Казарман автожолунун курулушунун аякташы, жакынкы аралыкта аймак аркылуу өтө турган темир жолдун курулушу Нарын облусунун социалдык-экономикалык өнүгүүсүнө шарт түзөрүн белгиледи.
Ал Жогорку Нарын ГЭС каскадынын курулушунун маанисин белгиледи.
"Аларды ишке киргизүү өлкөдөгү электроэнергияга болгон тартыштыкты жоюу менен бирге, башка мамлекеттерге экспорттоого жол ачат",— деди президент.
Президент Нарын облусунда башка облустардагыдай эле сугат системаларды өнүктүрүү маселеси абдан курч коюлгандыгын айтты.
Биринчи кезекте сугат тармагындагы артыкчылык маанидеги долбоорлорду ишке ашырууга тийиш экендигине токтолду.
"Сугат маселелери, аймактарда каналдарды куруу жана реконструкциялоо жакынкы жылдары мамлекеттик саясаттын негизги багыттарынын бири болот", — деди Атамбаев.
Мамлекет башчысы келерки жылы Нарын шаарын суу менен камсыз кылуу системасын реконструкциялоого жана тазалоочу жайлардын курулушуна зарыл каражаттар бөлүнөрүн айтты.
