БИШКЕК, 30-сен. — Sputnik. Шайлоочулардын ыңгайлуулугу үчүн 3-октябрдан тарта бардык шайлоо участкаларында сурап-билүү борборлору иштеп баштарын Тайырбек Сарпашев парламенттик шайлоону өткөрүү боюнча республикалык штабдын жыйынында билдирди.
Буга чейин сурап-билүү борборлору шайлоо күнү 4-октябрда иштейт делинген болчу. Борбордук шайлоо комиссиясынын суранычынан улам аталган борборлордун иши 3-октябрдан тарта баштай турганын Сарпашев кошумчалады.
Мындай аракеттер шайлоочулардын ыңгайлуулугу үчүн жасалып жатканын, алар шайлоого бир күн калганда келип керектүү маалыматтарды ала алышарын биринчи вице-премьер-министр баса белгиледи.
Андан сырткары, тийиштүү техникалык жардам берүү үчүн республика боюнча 350 оператор тартылат. Алардын бары аймактарга бөлүштүрүлдү. Алардын ишин Мамлекеттик каттоо кызматынын аймактык башкармалыктарынын жетекчилери тескеп турат.
