Кыргызстандын 18 жашка толгон бардык жарандары шайланууга укуктуу. Андан тышкары, бардык жарандар социалдык абалына, жынысына, расасына, улутуна, майыптыгына, билимине, кызматтык жана мүлктүк абалына, диний ишенимине, саясий жана башка көз караштарына карабай, мамлекеттик бийлик органдарына жана жергиликтүү өз алдынча башкаруу органдарына шайлануу укугуна ээ.
Өлкөнүн президенттигине 35 жаштан кичүү эмес жана 70 жаштан улуу эмес, мамлекеттик тилди билген жана республиканын аймагында жалпысынан 15 жылдан кем эмес жашаган ар бир адам талапкер боло алат.
Өз кыймыл-аракети үчүн жооп бере албайт деп сот тарабынан таанылган же эрки чектелген жайларда кармалуучу жарандардын шайланууга укугу жок. Андан тышкары, Жогорку Кеңешке жана мамлекет башчылыгына соттолгондугу мыйзам тарабынан белгиленген тартипте алып салына элек же мөөнөтүн өтөп бүтө элек жарандар да шайлана албайт.
