БИШКЕК, 23-сен. — Sputnik. Бир нече күндүн аралыгында Бишкектин 22 жаңы конушуна газ киргизилип, 300 чакырым газ түтүктөрү орнотулат. Бул тууралуу мэр Кубанычбек Кулматов "Керемет" жана "Касым" жаңы конуштарындагы газопроводдорун ачуу салтанатында билдирди.
Анын айтымында, газификациялоо — бул керектөөчүлөрдүн газга болгон муктаждыгын камсыз кылган ири социалдык долбоор.
"Газ ташуучу, газды жер алдында сактоо жана бөлүштүрүүчү жабдууларды масштабдуу оңдоо жана жаңылоо иштери пландаштырылууда. "Керемет" конушунун 250 жана "Касым" конушунун 190 үйү көгүлтүр от менен камсыз болот", — деди мэр.
Буга чейин мэрия жаңы конуштарды газ менен камсыз кылуу боюнча жумушчу топ түзгөн. Орточо басымдагы магистралдык газопроводдордун жанында жайгашкан 22 жаңы конуш аныкталган.
Биринчи этапта тогуз жаңы конуш тандалып алынып, Энергентика министрлиги газ менен камсыз кылуу боюнча иш-аракеттерди иштеп чыккан.
