БИШКЕК, 22-сен. — Sputnik. Кыргызстандын Башкы прокуратурасы издөөгө алынган Марат Бакиевге карата буга чейин жөнөтүлгөн эл аралык тергөө тапшырмаларын кайра карап чыгуу өтүнүчү менен Белоруссиянын Башкы прокуратурасына кайрылганын аталган мекеме билдирди.
Маалыматка ылайык, 2010-жылдан бери КР Башкы прокуратурасы Белоруссиянын укук органдарына бир нече ирет мурдагы президент Курманбек Бакиевдин жакындарына карата козголгон кылмыш иштери боюнча аларды Кыргызстанга өткөрүп берүү жана укуктук жардам тууралуу билдирмелер жөнөтүлгөн.
Бирок Белоруссиянын Башкы прокуратурасынын жообуна ылайык, республикалык маалыматтар топтомунда Марат Бакиев тууралуу эч нерсе табылган эмес. Анын жашаган жери тууралуу да эч кандай маалымат жок болуп чыкты. Мындан тышкары, Марат Бакиевдин Белоруссиянын чек арасынан өткөнү да катталган эмес.
Мындан улам жана буга чейинки сүйлөшүүлөрдү эске алуу менен КР Башкы прокуратурасы Марат Бакиевге карата эл аралык тергөө тапшырмаларын кайра карап чыгуу өтүнүчү менен Белоруссиянын Башкы прокуратурасына кат жөнөттү.
