БИШКЕК, 18-сен. — Sputnik. Акылга сыйбаган илимий табылгалар үчүн ыйгарылуучу Шнобель сыйлыгынын лауреаттарынын катарына быйыл Калифорния университетинин окумуштуулары кирди. Алар тооктун жумурткасы кайнап жатканда белоктун калыптанышына изилдөө жүргүзүшкөн деп жазат The Independent. Кайноо учурунда жумурткада жүргөн процессти жарым-жартылай артка буруу боюнча мындай ачылышы үчүн окумуштуулар химия боюнча Шнобель сыйлыгын алышты.
Биология боюнча бул сыйлыкты тоокторго жасалма куйрук байлап, айрым канаттуу динозаврлар азыркы канаттууларга кантип айланганын "жасалма куйруктуу тооктор динозаврлар сыяктуу ары-бери басышынан" көрсөткөн Чилинин окумуштуулары алды.
Ошондой эле Шнобель сыйлыгы адабият, физика, математика, экономика, медицина, психология жана менеджмент боюнча тапшырылган.
The Independent эске салгандай, бул сыйлык "биринчи күлкүнү келтирип, анан ойлонтууга мажбур кылган изилдөөлөр үчүн" ыйгарылат.
