БИШКЕК, 18-сен. — Sputnik. Жалал-Абаддын тургуну Тамара Исраилова 38 жылдан кийин Кызыл жарым ай уюмунун издөө кызматынын жардамы менен Чыгыш Казакстан облусунун Семей шаарында жашаган энесин тапты.
Катаал балалык
Тамара Исраилова ата-энеси ажырашып жатканда сегиз жашта эле. Үй-бүлө узак убакыт бою Сузакта жашагап, бирок Тамаранын туугандары орус келини менен батыша албай коюшкан. Кичинекей кыздын энеси кайындарынын көрсөткөн запкысынан улам Кыргызстандан таптакыр кетүүнү чечет.
"Чоң энемдин апам менен мамилеси жакшы эмес болчу. Көрсө, атам экөө биригип апамды кээде уруп коюшчу экен. Көпчө чейин чыдаптыр. Бирок акыры ажырашууну эп көргөн экен. Чоң энем апама мени да, инимди да бербей коюптур. Өзү менен тили чыга элек кичүү сиңдим Гүлнараны гана алып кеткен экен. Ошондон бери апамды көргөн жокмун", — дейт Тамара.
Аялдын айтымында, ушу күнгө чейин апасынын келбети, жыты анын эсинде.
"Бизди таштап кеткени үчүн апамды эч күнөөлөбөйм. Мен анын көргөн күнүн кантип унутайын. Бизди таштап кетүү канчалык оор болгонун да билем", — дейт Исраилова.
Тамара иниси экөө балалыктын бактылуу доорун анчейин сезбегенин кошумчалады. Апасы кеткенден кийин бир нече жылдан соң чоң энеси, көп өтпөй атасы да өлүп калган.
"Биз таптакыр эле чоочун адамдар менен жашадык. Апамды кичине чоңоё түшкөндөн баштап издедим. Бирок колумда апамдын жок дегенде кичинекей да сүрөтү жок эле", — деп ой бөлүштү маектеш.
Үмүт шооласы
Учурда Тамара Исмаилова төрт балага апа, төрт небереге чоң эне, таяне болгон кези. Апасы Наталья да балким бизди издеп жаткандыр деген үмүт менен "Жди меня" программасын калтырбай көрүп келген.
"Апама издөө салууга мага гезиттен окуган Залина аттуу аял менен уулу Сальвадордун окуясы чындап түрткү берди. Апамды табууга жардам беришет деген үмүт пайда болду. Өзүбүздө ушундай кызмат бар экенин билгенде аябай кубандым", — дейт Тамара.
Тамара Исраилованын энеси Наталья Одудованы издөө тууралуу арызды үстүбүздөгү жылдын февраль айында Кызыл жарым ай коомунун Жалал-Абаддагы өкүлүлүгү каттаган. Ал эми жарым жылдан кийин издөө иштери оң жыйынтык менен аяктаган.
"Наталья Владимировнанын табылганы тууралуу билгенде Тамара аз жерден эсин жоготуп кое жаздады. Алгач Россиядан издегенбиз, анткени Наталья ошол жакка кетти деген ой болгон. Бирок социалдык тармактардын жардамы менен аны Казакстандан таптык", — дейт долбоордун координатору Салтанат Абдыжапарова.
Эңсеген эне жыты…
Тамара Исраилова кичүү кызы Нурзат менен узак, бирок бактылуу сапарга жөнөдү. Кызыл жарым ай коомунун кызматкерлери программанын эсебинен аялга билет сатып берип, Семей шаарына чейин баруучу поездге салып ийишти. Бүгүн үй-бүлөнүн башы биригет. Тамараны кызы менен Казакстандагы Кызыл жарым ай коомунун кызматкерлери менен бирге Сергей тосуп алат.
Тамара өзү менен кошо улуттук кийим-кече, жер-жемиш жана өзүнүн колунан чыккан балды белекке алып бара жатат. Эң башкысы, ал энеге болгон чексиз кусалыгы, аруу балалык сүйүүсү менен бара жатат. Бул сүйүү эми аны өмүрүнүн акырына чейин коштоп жүрөт…
