БИШКЕК, 16-сен. — Sputnik. Москва мамлекеттик лингвистика университетинде Алыкул Осмоновдун чыгармачылыгы окутула турганын Кыргызстандын Россиядагы элчилиги билдирди.
Иш-чарага элчиликтин, кыргыз диаспораларынын, Алыкул Осмонов атындагы фонддун өкүлдөрү жана университеттин студенттери менен окутуучулары катышты.
Кыргызстандын Россиядагы элчиси Болот Жунусов кыргыз эли байыртадан элдик оозеки чыгармачылыкка бай экенин, ал эми акын Алыкул Осмонов улуу элдин сөзгө чебер урпакатарынан болгонун белгиледи.
"Ал керемет ыр саптарын жаратып тим болбостон, кыргыз окурманын биринчилерден болуп орус жана дүйнөлүк классиктердин чыгармалары менен тааныштырган белдүү котормочу болгон", — деди Жунусов.
Элчилик конференцияда акындын ар кыл жашоо мезгилдери жана чыгармачылыгы тууралуу айтылганын белгилейт.
Иш-чаранын соңу менен Россия коомчулугун Алыкул Осмонов жана башка адабият өкүлдөрүнүн чыгармачылыгы менен тааныштыруу каралган резолюция кабыл алынды.
