БИШКЕК, 15-сен. — Sputnik. Россиянын президенти Владимир Путин Кыргызстандын өлкө башчысы Алмазбек Атамбаев менен болгон жолугушуусунда эки мамлекеттин экономикалык өнүгүүсүнүн келечеги кең экенин белгиледи.
Эки тараптуу жолугушуу Тажикстанда өткөн ЖККУ саммитинен кийин болду.
Путин кыргыз-россиялык маселелерди талкуулоо үчүн шарт түзүлгөнүнө кубанычта экенин билдирип, Кыргызстандын ЕАЭБге кошулуу боюнча макулдашуунун күчүнө киргенин белгиледи.
"Бул эки мамлекеттин экономикасын өнүктүрүүгө, демек, социалдык маселелерди чечүүгө кошумча мүмкүнчүлүктөрдү берет", — деди Путин.
Жамааттык коопсуздук келишим боюнча уюмдун жыйынында ЖККУнун аскердик күчтөрүнүн мындан аркы аракеттери талкууланды. Армения, Белоруссия, Казакстан, Кыргызстан, Россия жана Тажикстан өлкө башчылары ЖККУнун жоопкерчилиги алдындагы аймактын коопсуздугу боюнча пикир алмашты.
