БИШКЕК, 13-сен. — Sputnik. Нефть, газ, көмүр жана башка отун түрүнүн жагылып түгөнүшү Антарктида мөңгүлөрүнүн эрип, деңиз деңгээлинин 60 метрге чейин көтөрүлүүсүнө алып келе турганын окумуштуулар Science Advance журналына жазып чыгышты.
"Биз эгер Антарктида толугу менен эрип кетпесин десек, Жер алдынан отун алууну жана атмосферага көмүр кычкыл газын чыгарууну токтотушубуз керектигин көрсөттүк. Эгер адамзат мындай аракеттерин токтотпосо, миллиард эл баш пааналаган жерлер жакын арада суу алдында калат", — дейт Стэнфорддогу Карнеги илим институтунун өкүлү Кен Калдейр.
Окумуштуулар мындай тыянакка алдыдагы 10 миң жылдын аралыгында антропогендик факторлордон улам өтө ысык аба ырайынын таасири менен өзгөрүүчү Антарктиканын компьютердик моделин түзгөндөн кийин келишкен.
Илимпоздор түшүндүргөндөй кийинки кылымда казылуучу отундун баары жагылса, Антарктиканын муздары он миң эмес миң эле жылда эрип жок болот. Мунун натыйжасында деңиз деңгээли дароо 60 метрге чейин көтөрүлөт да, Азия менен Европанын жээктеги мамлекеттери суу алдында калат. Ар бир жүз жыл сайын суунун деңгээли 100 метрге чейин жогорулап турат.
Буга чейин климатологдор Антрактиканы деңиз деңгээлинин көтөрүлүшүнүн себеби катары карашкан эмес. Бул жаатта абалы туруксуз деп эсептелген Гренландия менен Арктиканын мөңгүлөрү гана изилденип келген. Калдейр баштаган илимпоздордун эсеби Антарктика да түндүк "туугандары" сыяктуу эле суу деңгээлинин көтөрүлүшүнө негиз болорун көрсөтүүгө аракет кылышкан.
