БИШКЕК, 8 сен. — Sputnik. Британиялык илимпоздор генетикалык-модификацияланган тооктун бөтөнчө бир түрүн чыгарышты. Жүнү, буттары жана денеси караңгыда жашыл түстө каркырап күйүп турган бул тооктун түрү жыл сайын миллиондогон канаттууларды кырып жаткан сасык тумоодон коргоо үчүн вакцина түзүүгө жардам болот деп билдирет Reuters.
"Жашыл" ит, мышык, чычкан жана башка жандыктардын катарына эми тооктор да кошулду. Британиянын Эдинбург университетинин окумуштуулары ДНКсына GFP генинен тышкары, сасык тумоонун вирусунан коргой турчу бөтөнчө система жайгаштырылган тооктун түрүн чыгарышты. Окумуштуулар бул тоок канаттууларды патогенден сактоо үчүн вакцинаны жаратууга жардам берет деген үмүттө.
Мындай калканыч механизми, илимпоздордун сөзү менен айтканда, организмге кирген вирус үчүн өзүнчө бир куру "кылтак" болуп эсептелет. Себеби вирус өзү көбөйгөндүн ордуна баягы бош клеткаларды кайталап көчүрө берип, натыйжада жугуштуу оору жаңы өрчүп келе жатканда эле токтоп калат.
Дүйнөнүн эң ири тоок өндүрүүчүсү болуп эсептелген АКШда жана башка бир катар өлкөлөрдө азырынча мындай канаттууларды пайдаланууга тыюу салынган. Ага саясий себептер түрткү болууда, бирок илимпоздор АКШнын Азык-түлүк жана дары каражаттарын көзөмөлдөө башкармалыгы (FDA) жакынкы жылдарда трансгендик канаттууларды өндүрүүгө уруксат берет деген ишенимде.
