БИШКЕК, 2-сен. — Sputnik. Президент Алмазбек Атамбаев Кытайдын төрагасы Си Цзиньпин менен жолукканын өлкө башчысынын маалымат кызматы билдирди.
Атамбаевдин Экинчи дүйнөлүк согуштун аякташынын 70 жылдыгына арналган парадга катышуу үчүн Кытайга болгон иш сапары кечээ, 1-сентябрда башталган.
Жолугушуу учурунда Атамбаев Кытайдын төрагасы Си Цзиньпинге ыраазычылык билдирип, Кыргызстан Экинчи дүйнөлүк согушта Советтер Союзунун курамында Кытай менен бир тарапта турганын белгиледи.
"Биздин адамдар, анын ичинде кытай эли кандуу согушта ири жоготууларга учурады. Эртең боло турган Жеңиш парады элдерибиздин эрдигине, кайратмандыгына таазим болуп саналат", — деди Атамбаев.
Си Цзиньпин кытай эли Кыргызстан сыяктуу мамлекеттер менен бирге фашизмге каршы дүйнөлүк согушта Улуу Жеңишти камсыздаганын белгиледи.
Ага ылайык, жолугушууда чек ара маселелери боюнча жана техникалык-экономикалык жактан кызматташуу, ошондой эле кайтарымсыз грант тууралуу макулдашуулар болду. Кыргыз тараптан келишимдерге КРдин тышкы иштер министри Эрлан Абдылдаев, экономика министри Олег Панкратов кол коюшту.
