БИШКЕК, 2-сен. — Sputnik. Астрофизиктердин эл аралык коомчулугу тажик окумуштууларынын дүйнөлүк астрофизиканы өнүктүрүүгө жана асман телолорун изилдөөгө кошкон зор салымы үчүн Күн системасындагы кичи планеталардын бирине Тажикстан деген ат ыйгарышты.
Тажикстан планетасы Марс менен Юпитердин ортосунда, Жер шарынан 250 миллион, ал эми Күндөн 463 миллион чакырым аралыкта жайгашкан. Ал Күндү беш жылда бир жолу толук айланып чыгат.
"Мындай баалуу жетишкендиктер биздин окумуштуулар менен изилдөөчүлөрдөн мамлекет менен улуттун, ошондой эле жалпы адамзаттын кызыкчылыгы үчүн дагы көп күч-аракет жасоого шыктандырат", — деди өлкөнүн президенти күбөлүктү алып жатып.
Азыр Тажикстан планетасы Жерге эң жакын аралыкта турат, ошондуктан тажик окумуштуулары анын физикалык жана химиялык касиеттерин, анда жүрүп жаткан процесстерди изилдөөдө.
