БИШКЕК, 1-сен. — Sputnik. Ош шаарында жаңы окуу жылында 21 100 бала мектеп босогосун алгачкы жолу аттады деп билдирди шаар мэри Айтмамат Кадырбаев Жолон Мамытов атындагы орто мектепке барып, балдарды Билим күнү менен куттуктап жаткан учурда.
"Бүгүнкү күнү шаар боюнча 21 100 бала мектептин босогосун жаңыдан аттап отурат. Алардын тагдыры, келечеги мугалимдердин колунда. Бүгүн балдарга кандай тарбия-таалим берсек, эртең ошого жараша калыптанат. Ошондуктан терең билим, татыктуу тарбия берүү абзел", — деди Кадырбаев.
Андан соң мектептин 11-класстын окуучуларына жаңы окуу жылынын биринчи сабагын калаа башчысы өтүп, аларга шаарда болуп жаткан өзгөрүштөр, ошондой эле кесип тандоо боюнча айтып берди.
Учурда Ош шаарында 53 мамлекеттик мектепте 56 миң 660 окуучу билим алат.
