БИШКЕК, 27-авг. — Sputnik. ММА (аралаш аскер искусствосу) боюнча дүйнө чемпиону Федор Емельяненко Бишкекке келе албай турганын Панкратион федерациясынын президенти Нурлан Мурадилов билдирди.
Буга чейин Панкратион федерациясынын вице-президенти Эдил Касенов Федор Емельяненко 29-августта Бишкекте боло турчу мелдешке келе турганын билдирген эле.
Евразиялык шериктештик кубогунун эл аралык турнири Кыргызстандын ЕАЭБге кошулушуна арналып, Дөлөн Өмүрзаков атындагы стадиондо 29-августта өтөт.
"Федор келбей турган болду. Анын иштери чыгып калды", — деди Мурадилов.
Турнирге Россиянын, Казакстандын, Армениянын, Белоруссиянын жана Кыргызстандын спортчулары катышат. Жалпысынан 14 беттеш өтсө, алардын экөө супер мушташ болот.
Дене тарбия жана спорт агенттигинин өкүлдөрүнүн айтымында, турнирди демөөрчүлөр менен Улуттук олимпиада комитети каржылайт. Даярдык иштерин көрүүгө 60-70 миң доллар жумшалат.
Билеттин баасы 200 сомдон кем болбойт. Байгелүү оюндарга илинген спортчулар 1000 доллардан алса, жеңилгендердин демин суутпаш үчүн 500 доллардан берилет.
Федор Емельяненко ММА боюнча 40 мушташ өткөрүп, анын 35ин жеңип алган (12 нокаут). Ал эң көп жеңишке жетишип, түрдүү наамдарды алган россиялык спортчу болуп саналат. 2012-жылы ал бразилиялык Педро Хиззону жеңгенден кийин рингден кеткенин билдирген. Бирок 2015-жылы июлда спортко кайтып келген.
