БИШКЕК, 27-авг. — Sputnik. Кыргызстан ЕАЭБге кошулуп, чек ара ачылды, бирок базардагы кырдаал өзгөрбөстөн оор боюнча калып жатканын "Дордой" профсоюзунун төрайымы Дамира Дөлөталиева ЕАЭБ боюнча өткөн брифингде билдирди.
12-август күнү Кыргызстан ЕАЭБдин толук кандуу мүчөсү болду. Мындан улам анын биримдикке мүчө башка мамлекеттер менен чек арасындагы бажы көзөмөлү алынып салынды.
Дөлөталиеванын айтымында, товарды экспорттоо мурунку режимде эле жүрүп жатат.
"Биздин чек арачыларга эч кандай доомат жок. Казакстандын аймагында төлөнүп жаткан акча эмне үчүн алынып жатканы белгисиз. Унаалар да мурункудай эле токтулуп, жүк ташуу боюнча каралган жеңилдиктер сезилген жок", — деди ал.
Дөлөталиева Казакстандын аймагында мурункудай эле эл көп чогулуп, адамдар менен унаалардын көптүгүнөн баш аламандык жаралып жатканын белгиледи.
"Чек ара заставасынын жетекчиси экөөбүз бир аялдын казакстандык чек арачыга акча берип эч тоскоолдуксуз өтүп кеткенин өз көзүбүз менен көрдүк. Башкалар ошол боюнча калышты", — дейт профсоюздун төрайымы.
Ал бажы тарифтеринин жогорулашын дагы бир маанилүү көйгөй деп эсептей турганын кошумчалады.
"Маселе акыр аягына чейин иштелип чыккан эмес. Ишкерлер эмне кантип кымбаттаганын, товардын бир тоннасы канча турарын алигиче билишпейт. Эч бир маалымат жок, ар кимдин оозунан уккан сөз менен эле жашап атабыз", — деди Дөлөталиева.
