БИШКЕК, 25-авг. — Sputnik. Бишкекте өз энесин сабап өлтүргөн 36 жаштагы жаран кармалганын шаардык ИИБ билдирет.
Маалыматка ылайык, үстүбүздөгү жылдын 21-августунда Ленин РИИБ шаардын Арча-Бешик жаңы конушунда аял кишинин өлүгү табылгандыгы тууралуу билдирүү түшкөн.
Окуя болгон жерге барган милиция кызматкерлери 60 жаштагы аялдын бети шишип, жаагы, кабыргалары сынып киши колдуу болуп өлгөнүн аныкташкан. Иликтөө иштеринин натыйжасында аялдын үч уулу бар экени, ал кичүү баласы менен жашап келгени анык болду.
Ошол күнү мас болуп келген баласын уруша баштаган эне менен уулунун ортосунда чыр чыгып, баласы энесин сабай баштайт. Натыйжада алган жараттарынан аял каза болгон.
Учурда энесин өлтүргөн жаранга карата Кылмыш жаза кодексинин 97-беренесинин (Адам өлтүрүү) негизинде кылмыш иши козголуп, камакка алынды. Сот-медициналык экспертиза дайындалып, тергөө иштери уланууда.
