БИШКЕК, 20-авг — Sputnik. Ош шаарынын Султан Ибраимов атындагы драма театрында өткөн мугалимдердин август конференциясында шаар мэри Айтмамат Кадырбаев интерактивдүү такталарды ала турган мугалимдерге 39 сертификат тапшырды.
Кадырбаевдин айтымында, бүгүнкү күндө шаардын бардык мектептери заманбап, интерактивдүү такталар менен камсыз болду.
"Шаардын өнүктүрүү боюнча кабыл алынган программасынын алкагында мындай такталар менен шаардын бардык мектептерин 2017-жылга чейин камсыз кылуу каралган. Бирок биз муну эртерээк аткарып, жаңы окуу жылына карата бардык билим берүү мекемелерине сатып бердик. Максат – окуучуларга сапаттуу билим алууга ыңгайлуу шарттарды түзүп берүү", — деди Кадырбаев.
Буга чейин шаардын 14 мектеби интерактивдүү такталар менен камсыз болгон.
Ош шаарында бүгүнкү күндө жалпы билим берүүчү 53 мектеп бар.
