БИШКЕК, 20-авг. — Sputnik. АКШ өкмөтү менен болгон макулдашууну денонсациялоонун зыянынан пайдасы көп экенин саясат таануучу Токтогул Какчекеев өз маегинде билдирди.
Бейшемби күнү "КР эл аралык келишимдери жөнүндө" мыйзамына жана токтомго ылайык, кыргыз өкмөтү АКШ менен Кыргызстандын ортосундагы кɵмɵк кɵрсɵтүүнү жеңилдетүү боюнча кызматташууга байланыштуу келишимди денонсациялады.
Саясат таануучунун айтымында, мындай кадамы менен Кыргызстан өз алдынчалуулугун тастыктай алды.
"Эч кандай макулдашууларга карабай, Кыргызстан өзүнүн гана кызыкчылыгын көздөп, ошого жараша иш кылышы керек экенин түшүнө турган мезгил келди", — дейт Какчекеев.
Эксперт макулдашууну жокко чыгаруунун пайдалуу жагы көп экенин белгилейт. Анын айтымында, эми америкалык саясатты таңуулап, мамлекетти кыйратууга багытталган саны барб сапаты жок бейөкмөт уюмдарды каржылоо токтотулат.
"Денонсациялоо менен курулуш, маданият, билим берүү жана башка бир катар маанилүү тармактарды өнүктүрүү программалары токтоп калат деген пикирлер айтылууда. Элдин жан дүйнөсүнө таңууланган чоочун баалуулуктардын жанында мындай программалар шоона эшпей калат", — дейт саясат тануучу.
Какчекеев Кыргызстан үчүн зордук-зомбулук, абийирсиздик, ЛГБТ түшүнүктөрү дал ушул Батыштан таркаганын баса белгиледи.
"Кыргызстан өзүнүн өнүгүү багытын аныктады. Мында АКШ менен биздин жолубуз эки башка экени айкын болду. "жарандык коом" айгайлап жаткан көп багыттуулуктун арты жакшы болбойт", — дейт эксперт.
Саясат таануучу эки стандарттуу саясат өкүм сүрүп, дүйнөлүк олигархия биринчи орунга чыгып аткан маалда тарыхый жана руханий жактан жакын, санаалаш мамлекеттерден дос күтүү оң экенин белгиледи.
Албетте, Кыргызстан айрым финансылык булактардан кол жууйт, бирок тыңчылардын жасаган ишинин зыяны андан көп эсе чоң экенин айткан саясат таануучу мындан улам Кыргызстан денонсациялоонун пайдасын көбүрөөк көрөрүн кошумчалады.
Тышкы иштер министрлиги Азимжан Аскаров 2010-жылдагы июнь окуясында улуттар аралык каршылыкты козутуп, массалык башаламандыкты уюштурууга жана укук коргоо органдарынын өкүлүн өлтүрүүгө катышканы үчүн КР бардык сот инстанциялары тарабынан соттолгонун билдирип, аталган сыйлыктын ыйгарылышы тынчтыкка жана стабилдүүлүккө доо кетирүүчү чечим экени тууралуу билдирүү тараткан.
