БИШКЕК, 15-июль — Sputnik. КР Тышкы иштер министрлиги Азимжан Аскаровго АКШнын Мамлекеттик департаменти тарабынан "Адам укугунун коргоочусу" сыйлыгы менен сыйланышын Кыргызстан таң калуу менен кабыл алганы тууралуу билдирүү таратты.
Анда мындай жогорку сыйлык өкмөттүн кескин каршылыгына карабай узак убакыт бою адам укугун коргоо иштеринде күжүрмөндүк, эрдикти көрсөткөн жарандарга же уюмдарга берилери белгиленген.
"Азимжан Аскаров 2010-жылдагы июнь окуясында улуттар аралык каршылыкты козутуп, массалык башаламандыкты уюштурууга жана укук коргоо органдарынын өкүлүн өлтүрүүгө катышканы үчүн КР бардык сот инстанциялары тарабынан соттолгон. Анын жогоруда аталган сыйлыкка татыктуу экени күмөн. Аскаровдун кандуу окуялардагы аракети укук коргоо катары баалана албайт", — деп айтылат билдирүүдө.
Министрлик Аскаровдун сыйланышын АКШнын эл аралык терс резонанс жаратуу аракети деп эсептей турганын билдирген.
"Кыргызстан бул факторду калктын биримдигине доо кетирүүчү жагдай деп эсептейт. Аскаровдун сыйланышы өлкө ичинде жаңыдан калыпка түшүп келе жаткан улуттар аралык кагылыштарга алып келиши мүмкүн", — дейт министрлик.
Тышкы иштер министрлиги бул сыйлыктын Жогорку Соттун чечиминен төрт жыл убакыт өткөндөн кийин берилишин таң калуу менен кабыл алганын, аталган жогорку даража буга чейинки бир да укук коргоочуга берилбегенин белгилейт.
"Бул сыйлыктын берилиши "Манас" эл аралык аэропортунан транзиттик борбордун чыгарылышы жана Ричард Майлздын элчи болуп дайындалышы менен байланыштырууга мажбурбуз", — деп айтылат билдирүүдө.
Эскерте кетсек, "Адам укугунун коргоочусу" сыйлыгына 2011-жылы экс-президент Роза Отунбаевага тапшырылган.
ТИМ аталган сыйлыкты Аскаровго тапшыруу менен америкалык тарап эки мамлекеттин ортосундагы мамилелерге доо кетиргенин белгилеп, АКШ Мамлекеттик департаментинин чечимине каршылыгын билдирет.
