БИШКЕК, 17-авг. — Sputnik. Кыргыз-казак чек арасындагы "Ак-Жол" текшерип-өткөрүү пунктундагы абал турукташып, жарандар жана унаа каражаттары кадимки тартипте өткөрүлүп жатканын өкмөттүн маалымат кызматы билдирет.
Кыргызстандын ЕАЭБге кошулуусу менен тийиштүү чек ара постторунда бажы көзөмөлү алынып, жарандардын эркин өтүүсүнө жол ачылган. Мындан улам 13-августта өткөрүү пунктунда эки багыттуу унаа тыгыны пайда болгон. Кырдаалды жөнгө салуу үчүн өкмөттүк штаб түзүлгөн.
Чек ара кызматынын жетекчиси Райымберди Дүйшөмбиевдин билдирүүсүндө, учурда тыгындардын алдын алуу үчүн посттон Казакстандын жарандары өзүнчө, башка мамлекеттин жарандары өзүнчө өткөрүлүүдө.
