Кыргызстандын президенти Алмазбек Атамбаев ЕАЭБ алкагында кыргыз-казак чек арасында бажы тосмолору алып салгандыгы, кирип-чыгуу жеңилдегени тарыхый окуя деп баалады.
"Бул тарыхый окуя. Кыргыз-казак бир тууган эл, келечекте чек жана тосмо болбошу керек", — деди Атамбаев.
Назарбаев Ысык-Көлгө акыркы 3-4 жылдан бери буту баса электигин айтып, бул ирет көлдөн чоң канааттануу менен кайтарын билдирди. Андан сырткары, ЕАЭБ алкагында, чек аралардын ачылышы менен соода-сатык күчөрүн айтты.
"Ысык-Көл — дүйнөдөгү адамдын рухун көтөрө турган кереметтүү жер, адам бул жактан ар дайым кубат алып кайтат. Ал эми эки элдин алака-катнашы ар убакта жогорку деңгээлде болуп келген. Кыргызстандын ЕАЭБге толук кириши менен чын жүрөктөн куттуктайм. Мамлекет болгондон кийин анын чек арасы, анын коопсуздугу болот. Менин баамымда биздин келишпеген маселелерибиз жок, ал эми ЕАЭБ алкагында алака-катнашыбыз ары күчөйт деп ишенем", — деди Назарбаев.
Назарбаев Казакстандан Кыргызстанга келген инвестиция көлөмү 1,5 миллиард долларга жеткенин, учурда биргелешкен 50 ишкана иштеп жаткандыгын айтты.
