БИШКЕК, 8-авг. – Sputnik. Казакстандын Мойынкум районунда катталган жол кырсыгынан Кыргызстандын төрт жараны каза болуп, үч жараны Приозерск шаарындагы борбордук оорукананын жандандыруу бөлүмүнө жеткирилген. Бул тууралуу КР Өзгөчө кырдаалдар министрлиги Казакстандын Жамбыл облусунун Бирдиктүү нөөмөт-диспетчердик кызматына таянуу менен билдирди.
Маалыматка ылайык, жол кырсыгы Мойынкум районунун 405-чакырымында 7-августта таңкы саат 6:40да болгон.
"Сетра" үлгүсүндөгү жүргүнчү ташыган автобустун 29 жаштагы айдоочусу Нуржан Байтораев Астана – Шымкент багыты боюнча кетип баратып, жолдун каршы тарабына чыгып, "Тойота Ипсум" автоунаасы менен кагышкан. Жеңил унааны 27 жаштагы кыргызстандык айдап бараткан.
Жол кырсыгынын кесепетинен каза болгон кыргызстандыктар:
- Даниярбек Эркебаев, 27 жашта (Ош облусу, Өзгүр);
- Гүлүмкан Молдалиева, 38 жашта (Жалал-Абад облусу, Сузак району, Жоон-Күнгөй айылы);
- Исламбек Жаанбаев, 18 жашта (Жалал-Абад облусу, Сузак району, Жоон-Күнгөй айылы);
- Гүлбайра Атамирзаева, 41 жашта (Жалал-Абад обулсу, Ноокен району, Кызыл-Туу айылы).
Каза болгондордун сөөгү Шу шаарынын өлүкканасына жеткирилип, сот-медициналык экспертиза дайындалганын КР ӨКМден билдиришти.
Жабыр тарткан жүргүнчүлөр Канатбек Адилбек уулу, Акжол Батыркулов жана Гулзина Жусуп кызы Приозерск шаарынын борбордук ооруканасынын кайра жандандыруу бөлүмүнө жаткырылды.
"Сетра" үлгүсүндөгү автобустун жүргүнчүлөрү жабыркаган эмес. Учурда айдоочу Нуржан Байтораевди кармоо боюнча аракеттер болуп жатканын КР ӨКМден билдиришти.
Каза болгондордун жакындарына маалымат берилген.
Каза болгондордун сөөктөрүн алып келүү үчүн ыкчам топ жана "Спринтер" автоунаасы даярдалганын Өзгөчө кырдаалдар министрлиги билдирди.
