БИШКЕК, 5-авг. — Sputnik. Кыргызстан жыл сайын Түркмөнстандан жарым миллион тонна нефть импорттоону пландаштырып жатканын, бул маселе президент Гурбангулы Бердымухамедовдун мамлекеттик иш сапары учурунда талкууга алына турганын Sputnik агенттигине вице-премьер-министр Валерий Диль билдирди.
Түркмөнстандын башчысы Гурбангулы Бердымухамедовдун мамлекеттик иш сапарынын алкагында бир катар экономикалык, негизинен отун-энергетикалык маселелер талкууга алынат.
"Түркмөнстанда нефть ири көлөмдө казылат, андыктан импорт маселеси орчундуу турат. Мында Түркмөнстандан биздин нефть иштетүүчү заводдор үчүн 400-500 тонна нефть алуу каралып жатат", — деди вице-премьер.
Бул Гурбангулы Бердымухамедовдун Кыргызстанга болгон биринчи мамлекеттик иш сапары. 2014-жылдын ноябрь айында Кыргызстандын президенти Алмазбек Атамбаев Түркмөнстанга мамлекеттик иш сапары менен барып, достук, өз ара мамиле жана кызматташуу тууралуу келишимге кол коюп келген.
Эки өлкөнүн башчылары соода-экономикалык байланышты күчөтүү, транспорт, инвестиция жана отун-энергетикалык комплекс багытын активдештирүү маселесин талкууга алган.
