БИШКЕК, 4-авг. — Sputnik. Кыргызстан менен Түркмөнстан эки тараптуу кызматташтыкты өнүктүрүү үчүн бардык шарттарга ээ экенин вице-премьер-министр Валерий Диль "Кыргызстан-Түркмөнстан" форумунун ачылышында билдирди.
Анын айтымында, үстүбүздөгү жылдын төрт айында соода жүгүртүүнүн көлөмү 3,3 миллион долларды түзгөн. Вице-премьер бул көрсөткүч жетишсиз деңгээлде экенин белгиледи.
"Эки өлкөнүн бизнес коомчулугунун өкүлдөрү катышып жаткан бул форумдун өткөрүлүшү эки мамлекеттин ортосундагы соода-экономикалык байланыштарды кеңейтүүгө түрткү болот", — деди чиновник.
Экономика министрлигинин маалыматы боюнча Кыргызстандын тышкы соодасында Түркмөнстан 0,2 пайызды ээлейт. 2010-2014-жылдардын аралыгында эки өлкөнүн ортосундагы соода жүгүртүү 69 пайызга өскөн.
Бүгүн, 4-августта КРдин Соода-өнөр жай палатасында алгачкы ирет өтүп жаткан кыргыз-түркмөн бизнес-форуму Түркмөнстандын президенти Гурбангулы Бердымухаммедовдун Кыргызстанга боло турган расмий иш сапарынын алкагында өтүүдө.
