БИШКЕК, 31-июль — Sputnik. Жарандык кодекске өзгөртүүлөр киргизилип, ага ылайык, эми мыйзамсыз менчиктештирилген мамлекеттик, муниципалдык имараттарды кайтарууну талап кылуу мөөнөтү чектелбей турганын өлкө башчысынын маалымат кызматы билдирди.
Бүгүн, 31-июль күнү президент Алмазбек Атамбаев "КР Граждандык кодексине өзгөртүү жана толуктоо киргизүү жөнүндө” мыйзамга кол койду.
Мыйзам Жогорку Кеңеш тарабынан 2015-жылдын 29-июнунда кабыл алынган.
Мыйзамдын максаты мыйзамсыз менчиктештирилип туура эмес багытта пайдаланылган мамлекеттик, муниципалдык имараттарды кайтарууну талап кылган доонун эскирүү мөөнөтүн жоюу болуп саналат.
Мыйзам расмий жарыяланган күндөн тартып он күн өткөндөн кийин күчүнө кирет.
