БИШКЕК, 31-июль — Sputnik. Талас шаарындагы "Себат" балдар лицейинин окуучусу Темирлан Кубаналиев химия боюнча эл аралык олимпиадада коло байгеге ээ болгонун Билим берүү жана илим министрлигинин маалымат кызматы билдирди.
Москва мамлекеттик университеттин Баку шаарындагы филиалы тарабынан уюштурулган химия боюнча 47- эл аралык олимпиадага беш континенттин 75 өлкөсүнөн 300 жаш химиячы катышты. Калыстар тобу, эксперттер, мугалимдер, жетекчилер жана команда лидерлери болуп сынакка дагы 250 химиячы чогулду.
"Таластын 11-классынын окуучусу Темирлан Кубаналиев экинчи орунду ээлеген атаандашынан бир аз гана калып, коло байгесиен жетти", — деп билдиришти министрликтен.
Кыргызстандын атынан Талас менен Бишкектин 10-11-класстарынын төрт окуучусу барган. Делегациянын дагы бир күчтүү катышуучусу Дооронбек Маметов алдыңкы он мыктынын катарына кирди.
Делегация жетекчиси Бакыт Боркоевдин айтымында, Кыргызстан эки жылдан бери мындай жогорку көрсөткүчтөргө жетише элек эле.
"Темирлан эл аралык олимпиадага үчүнчү ирет катышып жатат. 2013-жылы Москвада, былтыр болсо Ханоеде олимпиадага катышкан. Байгелүү орунга жетүү үчүн ал жетиштүү тажрыйбага жеткен", — деди Боркоев.
Окуучулар олимпиадага эки ай даярданышкан.
Билим берүү министринин орун басары Токтобүбү Ашимбаева Кыргызстан химия боюнча эл аралык олимпиадага 16-ирет катышып жатканын белгиледи.
