БИШКЕК, 30-июль — Sputnik. Кыргыз эл артисти, Токтоболот Абдымомунов атындагы кыргыз улуттук академиялык драма театрынын актеру Мукамбет Токтобаев 68 жаш курагында жол кырсыгына кабылып, каза болду. Бул маалыматты Sputnik агенттигине аталган театрдын жетекчиси Темирлан Сманбеков билдирди.
Өмүрүнүн акыркы жылдарында Токтоболот Абдымомунов атындагы кыргыз улуттук академиялык драма театрында иштеп жаткан.
Кинодо "Фудзиямадагы кадыр түн", "Чиркин өмүр", "Айыл өкмөтү", "Сокур кемпир көрөгөч", "Президент менен бомж" тасмаларына тартылган. Эл аралык аренада Россия менен АКШ биргелешип тарткан "Взять Тарантину!" аттуу тасмасына түшкөн.
Улуу муундагы актерлордун ичинен Токтобаевге бүгүнкү күндүн режиссерлору тарабынан киного тартылуу үчүн көп сунуштар түшүп келген.
Мындан сырткары, "Каркыралар", "Кыздар жана көйнөктөр", "Биз отурган автобус", "Ышкырык" ырларына обон жараткан.
