БИШКЕК, 29-июль — Sputnik. Мамлекеттик каттоо кызматы (МКК) Кыргызстанда катталган автоунаалар жөнүндөгү маалымат базасы жеке жактарга берилип кетиптир деп ЖМКга чыккан маалыматтар боюнча түшүндүрмө берди.
Маалыматтык кызмат көрсөтүү боюнча үч тараптуу келишим 2014-жылдын 28-ноябрында кол коюлган күндөн тарта күчүнө кирген. Мамлекеттик каттоо кызматынын атынан аталган келишимге мурдагы статс-катчы Бактыбек Секимов кол койгон.
Келишимге ылайык, Мамлекеттик каттоо кызматы "Карфакс.кг" ЖЧКсына Адистештирилген борбор аркылуу маалыматтык кызмат көрсөтөт. Мамлекеттик каттоо кызматынан билдиришкендей, жеке уюм маалыматтык кызмат көрсөтүү жаатында кызматташууну сунуштаган.
Катта жазылгандай, онлайн-кызмат автотранспортторду сатуу жана сатып алууда алдамчылык аракеттердин алдын алууга жана сатып алуучудан машина жөнүндө бардык маалыматтарды жашыруу аракеттерине бөгөт коюу үчүн иштелип чыккан.
МККнын маалыматына ылайык, маалыматтык кызмат көрсөтүү өкмөттүн "электрондук өкмөт" токтомунун негизинде ишке ашып жатат.
Келишимге ылайык, кызматтын акысы антимонологияга каршы күрөшүү мыйзамынын негизинде Маалыматтык кызмат көрсөтүү боюнча адистештирилген борбордун тарифине ылайык 42 сом деп көрсөтүлгөн. Жеке компания, адистештирилген борборго бир ай ичинде берилген маалымат каттарга таянып, факты боюнча кызмат акысын төлөйт.
Ошондой эле, келишим боюнча жеке тарап, маалыматтык кызматтан пайдаланууну каалаган үчүнчү жактарга ар бир маалымат каттын баасын жана тарифтерди өзү койгонго укуктуу деп көрсөтүлгөн.
