БИШКЕК, 28-июль — Sputnik. Кыргызстандын Евразиялык экономикалык биримдигине кошулуу боюнча келишимди Россия, Армения жана Белоруссия толук колдогонун Тышкы иштер министринин орун басары Аскар Бешимов өкмөттүн жыйынында билдирди. Аталган мамлекеттер бул тууралуу Кыргызстандын Тышкы иштер министрлигине нота жөнөттү. Казакстандын бул жааттагы нотасы жакынкы күндөрү келип түшөрү күтүлүүдө.
Экономика министри Олег Панкратовдун айтымында, 19-июлда Кыргызстандын атайын делегациясы Казакстанда ветеринардык, фитосанитардык жана санитардык-эпидемиологиялык маселелерди көзөмөлдөөгө байланыштуу маселелерди талкуулады. Анын жыйынтыгы менен кыргыз делегациясынын маалыматын эске алуу менен казак-кыргыз мамлекеттик чек арасындагы санитардык-карантиндик көзөмөлдү алып салуу жана бул багытта Евразия экономикалык комиссиясына кабардар кылууга макул болду.
Премьер-министр Темир Сариев тиешелүү мамлекеттик органдарга Кыргызстандын Евразиялык экономикалык биримдигине кошулуусунун алкагында жол картасынын аткарылышын көзөмөлгө алуу жана чек араларды ачууга даяр болуу тапшырмасын берди.
