БИШКЕК, 27-июль — Sputnik. Түркиядан келген 23 дарыгер Бишкекте кыргыз хирургдары менен бирге 27-июлдан 1-августка чейин оор операцияларды жасайт. Бул туурасында Саламаттык сактоо министрилигинин маалымат кызматынан билдиришти.
Долбоор алкагында Кыргызстанда жасоого мүмкүн болбой операциялардын түрлөрү: балдар, жүрөк-кан тамыр, жалпы, пластикалык хирургия жана нейрохирургия, ошондой эле гинекология багытындагы операциялар жасалат. Муну менен бирге хирургия жаатында мастер-класстар өткөрүлөт.
Медициналык жардам акысыз көрсөтүлөт, бардык жабдуу, материалдар жана дары-дармек менен Түркия камсыздайт. Маалыматка ылайык, бардык операциялар алдын ала даярдалып, сүйлөшүүлөр апрель айынан баштап жүргүзүлүп келген. Негизинен тизмеге операция жасатуу үчүн Түркияга барууга мүмкүнчүлүгү жок оорулуулар кирди. Бул "Кыргызстандагы ден соолук жумалыгы" долбоорунун алкагында жасалууда.
Келечекте кыргызстандык адистерди Түркияга чакыруу демилгеси каралууда. Мындай операциялар жакын арада Бишкекте эле эмес, республиканын башка аймактарында да жасалышы пландаштырылууда.
