БИШКЕК, 27-июль — Sputnik. Президент Алмазбек Атамбаев "РусГидро" ишканасынын башкармалыгынын төрагасы Евгений Додду кабыл алып, аталган курулушту каржылоо боюнча сүйлөштү. Бул туурасында президенттин маалымат кызматы билдирди.
Дод "Жогорку-Нарын" ГЭСтер кыркасын куруу иштери "РусГидро" акционердик коомунун каражатынын эсебинен улантылып, 1 миллиард рубль бөлүнөрүн айтты.
"Бул жылга мурда бөлүнгөн каражаттарга кошумча дагы 1 миллиард рубль бөлүү жөнүндө чечим кабыл алынды. Ошондуктан курулуш иштерин кеңейтүү күтүлүүдө. Азыр биз белгиленген мөөнөттөрдү сактап келатабыз, иш өз убагында бүтөрүнө ишенем", — деди Дод.
Атамбаев өлкөнүн энергетикалык көз карандысыздыгын камсыз кылуу ишинде мааниси чоң "Жогорку-Нарын" ГЭСтер кыркасынын гидроэлектрстанцияларын көтөрүү боюнча бардык курулуш иштерин мурда белгиленген мөөнөттө жана сапаттуу бүткөрүү зарылдыгын белгиледи.
